Եվրոպական խորհրդարանի պատգամավոր Եվգենի Կիրիլովը երեկ «Առավոտին» է ուղարկել իր հետեւյալ հայտարարությունը՝ ՀՀԿ պատգամավոր Արտակ Զաքարյանի հունիսի 30-ի ասուլիսում արված պնդումների վերաբերյալ. «Մեծ զարմանքով տեղեկացա պրն Զաքարյանի հայտարարության վերաբերյալ «Հարավային Կովկասում ԵՄ ռազմավարության անհրաժեշտությունը» Եվրախորհրդարանի բանաձեւի առնչությամբ: Սկզբում չկարողացա հավատալ այդ տեղեկությանը, սակայն հետո պարզվեց, որ այն հայտնվել է բազմաթիվ հայկական ԶԼՄ-ներում:
Ես երբեք չէի սպասի, որ գործընկերներս՝ ազգային խորհրդարաններից այն երկրների, որոնք ձգտում են ավելի լավ եւ ավելի կառուցողական հարաբերություններ ունենալ ԵՄ հետ՝ կարող են ներգրավված լինել նման մեծ ապատեղեկատվության ու մանիպուլյացիայի մեջ, որն ակնհայտորեն հիմնված է ցանկացածն իրականի տեղ մատուցելու եւ բնավ ոչ փաստերի վրա:
Ավելի՛ն, դեմ առ դեմ խոսակցություն չի եղել, այլ ուրիշ մարդկանց ներկայությամբ, ովքեր գիտեին, թե ինչ է քննարկվում:
Ես դա համարում եմ շատ անքաղաքակիրթ եւ ոչ եվրոպական քաղաքական վարքագիծ՝ կեղծել մեր (այլ հանգամանքներում՝ կառուցողական) զրույցի ողջ բնույթը եւ ոգին: Այս վարքագիծը թերեւս թելադրված է պարոն Զաքարյանի մեծ ցանկությամբ՝ հայտնի դառնալ իր երկրում:
Ես նաեւ զարմանում եմ, որ այդ բոլոր հայտարարություններում նա խոսում է ԵԽԽՎ մասին եւ, փաստորեն, պետք է այժմ հասկանա, որ ինքը եղել է Եվրախորհրդարանում:
Պարոն Զաքարյանի հայտարարություններում միակ ճշմարիտն այն փաստն է, որ ես վերջերս հրավեր եմ ստացել Հայաստանի պաշտոնական իշխանություններից՝ այցելել Հայաստան եւ պատրաստակամությամբ ընդունել եմ այդ հրավերը: Չեմ նախատեսում հանդիպել պարոն Զաքարյանին, եթե գամ այդտեղ, բայց եթե պատահաբար հանդիպեմ նրան ինչ-որ տեղ՝ կարիք կունենամ առնվազն մեկ հեռուստախցիկի եւ երկու ձայնագրիչի:
Ինչպես արդեն հայտարարել եմ հայկական ԶԼՄ-ներին տրված իմ հարցազրույցներում՝ ես լիովին համոզված եմ, որ Եվրոպական խորհրդարանի այս բանաձեւը բխում է Հայաստանի եւ հայ ժողովրդի երկարաժամկետ շահերից»: