ԼՂՀ նախկին արտգործնախարար Արման Մելիքյանը երեկ լրագրողների հետ հանդիպման ժամանակ անդրադառնալով ԼՂ նախագահի մամուլի խոսնակ Դավիթ Բաբայանի՝ բանակցային գործընթացի ձեւաչափի փոփոխության մասին հայտարարությանը՝ ասել է, որ եթե ԼՂ նախագահի խոսնակն է դրա մասին խոսում, նշանակում է՝ Ղարաբաղում դրա համար իրավիճակը հասունացել է: Այդուամենայնիվ, Արման Մելիքյանի կարծիքով, ԼՂ իշխանությունների «քաշը» թույլ չի տալիս նման պահանջ ներկայացնել, քանի որ ԼՂ հարցի կարգավորման ձեւաչափի հարցը լուծվում է Հայաստանում։ Նա նշել է, որ քաղաքական այն ուժը, որն ունակ է ԼՂ խնդրի ձեւաչափի փոփոխման հետ կապված վերանայումներ պահանջել ՀՀ իշխանությունից՝ Հայ ազգային կոնգրեսն է, որը, սակայն, լռում է, որովհետեւ այդ ուժի ու իշխանությունների մոտեցումները ԼՂ հակամարտության կարգավորման գործընթացների վերաբերյալ նույնական են։ «Ցավոք, Կոնգրեսն այսօր ծառայում է որպես քաղաքական հենարան՝ իշխանությունների համար»,- եզրակացրել է ԼՂՀ ԱԳ նախկին նախարարը: