Երեկ ԵՊՀ-ում ամփոփվեց անգլերեն լեզու բանավոր քննությունը:
Առարկայական հանձնաժողովի նախագահ Մարգարիտա Ապրեսյանը «Առավոտ»-ի հետ զրույցում նշեց, որ այնքան էլ գոհ չէ դիմորդների գիտելիքներից. «Բանավոր քննությունը ավելի շատ բնավորության բացահայտում է, քան գիտելիքների ստուգում: Կան երեխաներ, որ իրենց կարողանում են գեղեցիկ ներկայացնել, որոշներն էլ չնայած խելամիտ են, բայց չեն կարողանում իմացածն արտահայտել»: «Առավոտը» տիկին Ապրեսյանին փոխանցեց ծնողների այն դժգոհությունը, թե թեմայից դուրս հարցեր են տրվում դիմորդներին: Նա պատասխանեց. «Դա չի համապատասխանում իրականությանը: Դիմորդների մեծամասնությունը «թոփիկներն» անգիր արած գալիս է քննության: Արդյունքում զավեշտական պահեր են առաջանում»:
Դիմորդների գերակշռող մասն «Առավոտին» ասաց, որ կրկնուսույցների մոտ պարապել է շուրջ մեկ տարի, ինչը լրիվ բավական է: Օրինակ՝ Էլլան ԱՄՆ-ից էր ժամանել: Դիմորդը ցանկություն ունի հետագայում աշխատել արտաքին գործերի նախարարությունում եւ հաստատվել ՀՀ-ում: Մարգարիտան էլ հուզմունքից մոռացել էր իր անունը: Վերջինս լսարանից դուրս եկավ արցունքն աչքերին, բայց՝ ուրախությունից, քանի որ «14» էր ստացել. «Մանկուց երազել եմ թարգմանություն անել»: