Նախօրեին էլեկտրաէներգիայի դիմաց կուտակած պարտքի պատճառով «Հայաստանի էլեկտրական ցանցերը» մասամբ հոսանքազրկել է «Նաիրիտ» քիմիական գործարանը: Ըստ ՀԷՑ-ի՝ պարտքը կազմում է 829 միլիոն դրամ:
Երեկ ժամը 17-ի դրությամբ ձեռնարկության հոսանքի մատակարարումը դեռեւս վերականգնված չէր: «Առավոտի» հարցին, թե այդ օրերի ընթացքում գործարանն ինչքա՞ն վնասներ է կրել, «Նաիրիտից» որեւէ մեկնաբանություն չտվեցին, միայն ասացին, որ հաշվարկ է կատարվում եւ որ հոսանքազրկումն իրականացվել է կոպիտ խախտումներով:
Այս առնչությամբ «Հայէլցանցերից» պարզաբանեցին, որ իրենք ոչ մի օրենք էլ չեն խախտել եւ որ «Նաիրիտ»-բաժանորդը օրենքով սահմանված կարգով, այսինքն՝ 3 օր առաջ գրավոր տեղեկացվել է այդ մասին: Հաշվի առնելով, որ «Նաիրիտը» քիմիական գործարան է, ոչ մասնագետ լինելով հանդերձ էլ կարելի է հասկանալ, որ նման ձեռնարկությունների գործունեության միանգամից դադարեցումը կարող է պայթյունավտանգ լինել ու դժբախտ հետեւանքներ ունենալ: Բացի այդ, տարբեր առիթներով ձեռնարկության պատասխանատուները բազմիցս նշել են, որ քիմիական արտադրամասերի աշխատանքը դադարեցնելը մի ամբողջ գործընթաց է, որի համար հարկավոր է 15-20 օր: Սակայն այս հանգամանքը ՀԷՑ-ը հաշվի չի առել: Երեկ, երբ մեր այս մտահոգությունը փոխանցեցինք էլեկտրամատակարարին, ընկերության պատասխանատուները հայտնեցին, որ էլեկտրաէներգիայի մատակարարման եւ օգտագործման կանոնների համաձայն, վթարային կամ տեխնոլոգիական հզորություն ունեցող սպառողներն էլ, ըստ պայմանագրի, զգուշացվում են 3 օր առաջ:
Նկատենք, որ երեկ «Նաիրիտում», մեր տեղեկություններով, վիճակն այնքան լարված ու վտանգավոր է եղել, որ հրշեջ ջոկատները պատրաստ սպասել են:
Ավելի ուշ տեղեկացանք, որ էլեկտրաէներգիայի մատակարարումը վերականգնվել է: