Այսօր Արամ Խաչատրյանի տուն-թանգարանում Ազգային օպերային թատրոնի սիմֆոնիկ նվագախմբի մենակատարների անսամբլի, «Արամ Խաչատրյան» տրիոյի, երգչուհի Դիանա Հարությունյանի, դաշնակահար Հայկ Մելիքյանի կատարմամբ կհնչեն իմպրեսիոնիստական եւ նոր վիեննական դպրոցի գաղափարների կրող ու շարունակող ռուս անվանի կոմպոզիտոր Էդիսոն Դենիսովի երկերը: Համերգի կազմակերպիչն է արվեստագիտության դոկտոր, Երեւանի Կոմիտասի անվան կոնսերվատորիայի պրոֆեսոր Սվետլանա Սարգսյանը: Այս նախագիծը պրոֆեսորի դեռեւս 1992թ. հիմնած «Նոր նախաձեռնություններ» համերգաշարի հերթական ծրագիրն է: Հիշեցնենք, որ Ս. Սարգսյանը այս տարիների ընթացքում իր նախագծերով (ամերիկյան, անգլիական, իտալական երաժշտության դպրոցներ, թեմատիկ երեկոներ, նվիրված, օրինակ՝ Շոնբերգին եւ նրա դպրոցին, Իգոր Ստրավինսկու, Քշիշտոֆ Պենդերեցկու եւ այլ երեւելիների հոբելյաններ) ներկայացնում է ժամանակակից երաժշտության հայաստանյան առաջին կատարումներ:
«Առավոտի» հետ զրույցում Ս. Սարգսյանն ասաց, որ «Նոր նախաձեռնություններ» համերգաշարը կարծես լրացնում է իր երաժշտագիտական գործունեությունը. «Նպատակս է՝ տարբեր համերգներին հնչած ժամանակակից կոմպոզիտորների բարձրարվեստ գործերը դարձնել մեր երաժշտական իրականության անբաժան մասը»: Խոսելով Դենիսովի արվեստի մասին՝ մեր զրուցակիցը հայտնեց, որ նա երկու օպերաների («Օրերի փրփուր», «Չորս աղջիկ»՝ ըստ Պիկասոյի նկարների), մեկ բալետի («Խոստովանություն»), երկու սիմֆոնիաների, ռեքվիեմի եւ բազմաթիվ կամերային գործիքային երաժշտության հեղինակ է: Իսկ նրա երաժշտությունը իսկապես աչքի է ընկնում նուրբ ճաշակով, յուրաքանչյուր հնչյունի նկատմամբ տածած «ջերմ» վերաբերմունքով: «Դենիսովն իր ավանգարդ երաժշտությամբ ժամանակին ընդգրկվել է Ռուսաստանի կոմպոզիտորների միության նախագահ Տիխոն Խրեննիկովի «սեւ ցուցակում»՝ իր 7 կոլեգաների հետ»,- նշեց Ս. Սարգսյանը: Հարցին, թե ինչո՞ւ համերգաշարերում չի անդրադառնում հայ որեւէ մեծանուն կոմպոզիտորի, օրինակ, աշնանը լրանում է Ալեքսանդր Հարությունյանի 90-ամյակը, երաժշտագետը նախ հայտնեց, որ ժամանակին կազմակերպել է երեկո՝ միայն հայ ժամանակակից կոմպոզիտորների երաժշտությունից, հետո էլ հավելեց. «Անում եմ այն, ինչը մեկ ուրիշը չէր անի: Համոզված եմ, որ անվանի կոմպոզիտոր Հարությունյանի հոբելյանը կնշվի պետական մակարդակով»: