Ինչպես հայտնում են մեզ Փարիզից, գրաքննադատ, արձակագիր, թարգմանիչ եւ հրապարակախոս Ալեքսանդր Թոփչյանն օրերս արժանացել է ֆրանսիական կառավարության բարձր պարգեւին՝ «Արվեստների եւ գրականության սպայի» (Officier de l'Ordre des Arts et des Lettres) շքանշանին:
Ինչպես Անդրե Մալրոն կասեր՝ «Կերպարվեստագետների, գրողների եւ ստեղծագործողների կողմից հարգված ու տենչված» այս շքանշանը հիմնվել է 1957թ. եւ շնորհվում է նշանակալի վաստակ ունեցող գրողներին ու արվեստի գործիչներին, անշուշտ, հաշվի առնելով նաեւ նրանց մատուցած ծառայությունները ֆրանսիական մշակույթին: Այս շքանշանը երեք աստիճան ունի՝ ասպետ, սպա եւ կոմանդոր, եւ շնորհվում է ըստ հերթականության, փոքրից դեպի մեծը: Ալ. Թոփչյանի դեպքում բացառություն է արվել եւ նրան միանգամից շնորհվել է Սպայի աստիճանը: Դժվար չէ կռահել, որ նման որոշում ընդունելուն նպաստել է հայ գրողի ծանրակշիռ վաստակը՝ ֆրանսիական մշակույթի տարածման գործում: Բավական է հիշել միայն նրա թարգմանությամբ հայերեն լույս տեսած ֆրանսիացի հեղինակների վաթսունհինգ գրքերը: