«Ընդդեն գենդերային բռնության Հայաստանում» ծրագրի շրջանակներում Լոռու մարզի տարբեր վայրերում իրազեկման հանդիպումներ են կազմակերպվում՝ Մարդկային զարգացման միջազգային կենտրոնի, Համալսարանական կրթությամբ կանանց ասոցիացիայի (ՀԿԿԱ) եւ «Տաթեւ» հոգեբանական աջակցության եւ խորհրդատվական կենտրոն» հ/կ-ի համատեղ նախաձեռնությամբ: ՀԿԿԱ Վանաձորի մասնաճյուղի փոխնախագահ, Վանաձորի պետական մանկավարժական ինստիտուտի ինֆորմատիկայի ամբիոնի դոցենտ Արմենուհի Կյուրեղյանը պարզաբանեց «Սեռ» եւ «Գենդեր» հասկացությունների տարբերությունները, խոսեց գենդերի սոցիալականացումից եւ գենդերային կարծրատիպերից, անդրադարձավ գենդերային խտրականության թեմային, գենդերային հավասարության ազգային եւ միջազգային փաստաթղթերին ու մեխանիզմներին: Իսկ ՀԿԿԱ Վանաձորի մասնաճյուղի քարտուղար, մանկավարժական համալսարանի ինֆորմատիկայի ամբիոնի դասախոս Կարինե Սիրադեղյանը ներկայացրեց գենդերային բռնության երեւույթներն ու դրսեւորումները, տեսակները, խոսեց ներընտանեկան բռնությունից, մարդկանց թրաֆիքինգից եւ ընդդեմ գենդերային բռնության՝ տարածաշրջանային ու միջազգային նախաձեռնություններից: Ծրագրի մասին խոսելիս Ա. Կյուրեղյանն անդրադարձավ գենդերային գաղափարախոսության ներդաշնակ հարաբերություններին. «Մեր խնդիրն է հանրությանն իրազեկել, որ այդ խնդիրները հավասարապես վերաբերում են թե կանանց, թե տղամարդկանց,- ասաց Ա. Կյուրեղյանը,- մեր երկիրը գենդերային հավասարություն ապահովող մի շարք փաստաթղթեր է ստորագրել, ներկայումս կա նաեւ հավասար հնարավորությունների երաշխիքների ստեղծման խնդիր: Արդեն մշակված են կանանց եւ տղամարդկանց հավասար իրավունքների եւ հնարավորությունների պետական երաշխիքների մասին օրենքի նախագիծը եւ գենդերային պետական հայեցակարգը, որոնք մինչեւ 2010 թ. պետք է դրվեն քննարկման»: