aravot.am


16/	03/2010
aravot.am	Օրաթերթ

ԽՄԲԱԳՐԻ ՍՅՈՒՆԱԿ

Մտքի արատ

Հունվարին նշվում էր ռուս մեծ գրող Անտոն Չեխովի ծննդյան 150-ամյակը: Բնականաբար, Հայաստանում այդ իրադարձությունն առանձնապես չկարեւորվեց. մենք հազիվ մեր մեծերի մասին ենք հիշում, էլ ուր մնաց՝ օտարազգիների: Չգիտես ինչու՝ մեզանում այդ գրողի անունը ասոցացվում է մեր անկախության այն ժամանակաշրջանի հետ, երբ որոշ՝ ոչ այնքան խելամիտ մարդկանց «ազգային ինքնագիտակցությունը» անսպասելիորեն դրսեւորվեց Չեխովի արձանի նկատմամբ չպատճառաբանված ագրեսիայի տեսքով: Այնինչ մենք բազմաթիվ այլ առիթներ ունենք խոսքի այդ մեծ վարպետին հիշելու, եւ անձամբ ինձ համար նա հեղինակություն է նախեւառաջ իր հետեւյալ արտահայտության պատճառով. «գրելու արվեստը ջնջելու արվեստի մեջ է»: Այսինքն՝ դուք լավ եք գրում այնքանով, որքանով շատ եք կարողանում ջնջել, կրճատել ավելորդ բառերն ու զեղումները եւ սեղմ շարադրել ձեզ անհանգստացնող գաղափարները: Եթե Չեխովի այդ բանաձեւը փորձենք կիրառել արդի հայ իրականության նկատմամբ, ապա վստահաբար կարելի է ասել, որ մեր լրագրողները, առավել եւս՝ հրապարակախոսները, մեկնաբանները, մտավորականները, հասարակական, քաղաքական գործիչները մեծ մասամբ գրել եւ, ավելացնեմ նաեւ՝ խոսել չգիտեն: Դա, իհարկե, առաջին հերթին, ինքնասիրահարվածության նշան է. նրանք այնքան վստահ են իրենց ամեն մի բառի արժեքի մեջ, որ կարծում են՝ իրենց բստրած ցանկացած գրավոր կամ բանավոր «լավաշ» արժանի է հրապարակման: Երբ նրանք գրում են, ասենք, հայ-թուրքական հարաբերությունների մասին, ապա անպայման պետք է սկսեն 11-րդ դարից, իսկ ղարաբաղյան հիմնահարցը քննարկելուց պարտադիր պիտի «գան հեռվից»՝ առնվազն Կավբյուրոյի որոշումից: Ինքնասիրահարվածության անբաժանելի մաս է նաեւ, բնականաբար, դիմացինի նկատմամբ հարգանքի պակասը: Նրանք, ովքեր ինձ բերում կամ ուղարկում են հոդված՝ 2 կոմպյուտերային էջից ավելի մեծ, չեն հարգում ոչ միայն ինձ, այլեւ ընթերցողներին՝ ենթադրելով, որ վերջիններս պարտավոր են խորանալ իրենց զեղումների մեջ: Եվ վերջապես. երկար գրելը կամ խոսելը նաեւ ծուլության նշան է. մարդիկ զլանում են աշխատել իրենց տեքստերի վրա:
Դուք կհարցնեք հավանաբար՝ մի՞թե այդ խնդիրն այդքան հրատապ է: Այս օրհասական պահին, երբ կտրուկ սրվել է հայ-թուրքական հաշտեցման գործընթացը, եւ երբ ժողովուրդը վայելում է ճգնաժամից պատվով դուրս գալու կառավարության ջանքերը, ի՞նչ իմաստ ունի քննարկել գրելու եւ խոսելու մշակույթի խնդիրները: Նման մոտեցման հետ ես համաձայն չեմ: Վերոհիշյալ մշակույթի բացակայությունը, ի վերջո, մտքի արատի հետեւանք է: Չէ՞ որ ակնհայտ է, որ մարդը չի կարողանում հստակ խոսել կամ գրել հենց այն պատճառով, որ ունակ չէ հստակ մտածել, որ նրա գրիչը կամ լեզուն ընկնում է մտքից առաջ: Իսկ երբ մարդիկ չեն մտածում, նրանք չեն կարողանում մտքեր փոխանակել, քննարկել ու բանավիճել: Իսկ դա, իր հերթին, բերում է ամենավատ հետեւանքի՝ նրանք, մեծ հաշվով, չգիտեն, թե ինչ են ուզում:
Ուստի՝ ընդօրինակելով մեր դասականին, կարելի է բացականչել. «Ով հայ ժողովուրդ, քո փրկությունը մտքերդ հակիրճ ձեւակերպելու մեջ է»:

ԱՐԱՄ ԱԲՐԱՀԱՄՅԱՆ

ՄԻՏՔ

Սպորտ

2010-03-13

ՄԵԴԱԼԻ ՀՈՒՅՍԵՐ ԿԱՆ

Ռիեկայում շարունակվում են շախմատի Եվրոպայի տղամարդկանց եւ կանանց անհատական առաջնությունները:
Հայաստանցի շախմատասերներին շարունակում է ուրախացնել կանանց միջազգային գրոսմայստեր Լիլիթ Գալոյանը: Վեցերորդ տուրում հայ շախմատիստուհին սեւ խաղաքարերով անչափ կարեւոր հաղթանակ տարավ Ուկրաինայի ներկայացուցիչ Աննա Ուշենինայի նկատմամբ եւ 5,0 միավորով բաժանում է 2-4-րդ տեղերը:
Մրցաշարային աղյուսակի համեմատաբար բարձր տեղերում ընթացող մեր աղջիկներից Էլինա Դանիելյանն ու Լիլիթ Մկրտչյանը բավարարվեցին ոչ-ոքիներով եւ 3,5-ական միավորով, համապատասխանաբար, 53-րդ եւ 62-րդ տեղերում են: Նրանք ամենայն հավանականությամբ արդեն մրցանակային տեղերի համար չեն պայքարի: Ինչ վերաբերում է Լիլիթ Գալոյանին, նա երեկ սպիտակներով խաղալու էր միանձնյա առաջատար, իր անվան դիմաց 5,5 միավոր գրանցած գրոսմայստեր Մոնիկա Սոչկոյի (Լեհաստան) հետ:

Բոլոր Նյութերը >>>

2010-03-13

Սեքսն օգնում է սպորտում հաղթելուն

Պրոֆեսիոնալ մարզիչները սպորտում սեքսին տարբեր տեսանկյունից են նայում:
Մոտ երկու-երեք տասնամյակ առաջ թիմերի մեծ մասի համար մրցման նախորդ գիշերը սեքսով զբաղվել կտրականապես արգելված էր: Իբրեւ թե, ֆիզիկական եւ էմոցիոնալ էներգիան պետք չէ հենց այնպես վատնել: Օրինակ, Մուհամեդ Ալին մարտին նախորդող երկու շաբաթներին դադարեցնում էր կանանց հետ բոլոր տեսակի շփումները:
Այժմ մարզիչները բաժանվել են երկու բանակի՝ պահպանողականների, որոնք շարունակում են նախկին համոզմունքներին մնալ եւ առաջադեմների, որոնք ունկնդիր են գիտնականների կարծիքին: Իսկ գիտնականները պարզորոշ ասում են. «Սեքսի առումով անցկացրած լավ գիշերը չի ազդում ուժի, դիմացկունության եւ ֆիզիկական պատրաստվածության վրա»: Միակ բանը հոգեբանական գործոնն է: Մարզիկների մեծամասնությանը ամբողջովին ներդրվելու համար ագրեսիա է հարկավոր: Լավ սեքսը թուլացնում ...

Բոլոր Նյութերը >>>

2010-03-13

Վեց մասնակից

Բռնցքամարտի Հայաստանի ազգային հավաքականի վեց անդամներ գտնվում են Չեխիայում, որտեղ վաղվանից մեկնարկում է միջազգային ներկայացուցչական խոշոր մրցաշար: Մեր հանրապետությունից ռինգ կմտնեն հետեւյալ բռնցքամարտիկները:
57 կգ՝ Ազատ Հովհաննիսյան,
60 կգ՝ Արա Պուլուզյան,
64 կգ՝ Հրաչյա Ջավախյան,
69 կգ՝ Արմեն Եփրեմյան,
75 կգ. Անդրանիկ Հակոբյան,
91 կգ՝ Ցոլակ Անանիկյան:

Բոլոր Նյութերը >>>

2010-03-13

Արոնյանի երրորդ փորձը

Այսօր Ֆրանսիայի Նիս քաղաքում մեկնարկում է «կույր» եւ արագ շախմատի «Amber Blindfold and Rapid Tournament» 19-րդ ավանդական գերմրցաշարը, որի կազմակերպիչը հոլանդացի մեկենաս Օստրեմն է:
Աշխարհի 12 ուժեղագույն գրոսմայստերներին երկու դեպքերում էլ տրվում է 25 րոպե՝ յուրաքանչյուր քայլի համար ավելացվելով 10 վայրկյան՝ արագ շախմատում եւ 20 վայրկյան՝ «կույր» շախմատում:
Մրցաշարի ընդհանուր մրցանակային ֆոնդը 216 հազար եվրո է:
«Amber» մրցաշարի վերջին երկու տարիների հաղթողը Հայաստանի լավագույն շախմատիստ Լեւոն Արոնյանն է: Այնպես որ, սա նրա՝ առաջինը դառնալու երրորդ փորձն է: Վիճակագրությունն ասում է, որ այս մրցաշարի առաջին հաղթողը Ուկրաինայի ներկայացուցիչ Վասիլի Իվանչուկն է (1992 թ.), իսկ հաղթանակների քանակով ռեկորդը՝ վեց, պատկանում է Վլադիմիր Կրամնիկին (Ռուսաստան):

Բոլոր Նյութերը >>>

ՄՈԻՏՔ