Այսօր խորհրդարանում շարունակվող 2017 թվականի բյուջեի կատարողականի քննարկումների ժամանակ տհաճ միջադեպ տեղի ունեցավ: Նիստը նախագահող Խոսրով Հարությունյանն ամբիոնի մոտ էր հրավիրում Տրանսպորտի, կապի եւ տեղեկատվական տեխնոլոգիաների նախարար Աշոտ Հակոբյանին: Մի երիտասարդ մոտեցավ: «Դուք պարոն Հակոբյանն ե՞ք»,- զարմանքը չթաքցրեց Խոսրով Հարությունյանը: «Ոչ, ես նրա առաջին տեղակալն եմ»,- ասաց երիտասարդը: «Իսկ ո՞ւր է նախարարը»,- հետաքրքրվեց Խոսրով Հարությունյանը: «Վարչապետին է ուղեկցում»,- պատասխանեց նախարարի նորանշանակ առաջին տեղակալ Հակոբ Արշակյանը:
«Այսինքն, գործուղման մե՞ջ է, գնացել է գործուղմա՞ն: Այդ ժամանակ մեզ պետք է տեղյակ պահեք, այլապես ես ձեզ էլ անհարմար վիճակի մեջ դրեցի, ինքս էլ անհարմար վիճակում հայտնվեցի»,- ասաց Խոսրով Հարությունյանը:
«Շատ անհարմար չի վիճակը, նորմալ է, ես հիմա կներկայանամ եւ կշարունակեմ»,- ասաց փոխնախարարը եւ ներկայացրեց անցած տարվա բյուջեի կատարողականի` իրենց վերաբերվող հատվածը:
Նելլի ԳՐԻԳՈՐՅԱՆ
