«Շիրակի պետական համալսարանի ռեկտորը վրեժխնդիր է լինում»,-Aravot.am-ի հետ զրույցում այսպիսի կարծիք հայտնեց այս բուհից հեռացված ռեկտորի տեղակալ Անահիտ Ֆարմանյանը:
ՇՊՀ-ի ռեկտոր Սահակ Մինասյանը, մինչ այս էլ բուհից հեռացրել էր պատմության եւ փիլիսոփայության ամբիոնի վարիչ Հովհաննես Խորիկյանին, նույն ամբիոնի դասախոս Գագիկ Համբարյանին:
Անահիտ Ֆարմանյանի պատմելով՝ ռեկտորը ծանուցում է ուղարկել, թե կառուցվածքային փոփոխություններ է կատարել, ինչի արդյունքում էլ Ֆարմանյանի մասնագիտական հմտությունների կարիքը չկա:
«Սերժ Սարգսյանի հրաժարականի երեկոյան ինքը կառուցվածքային փոփոխություններ է անում, որովհետեւ հրատապ վրեժխնդրության խնդիր էր դրել: Ասում է՝ իմ մասնագիտական պատրաստվածության եւ պաշտոնին համապատասխան այլ աշխատանք չենք կարող առաջարկել: Ասեմ, որ նույն բուհի հավատագրման հիմքում ես ինքս եմ կանգնած եղել, ու բուհը շատ փայլուն, բարձր մակարդակով կարողացել է իր առջեւ դրված խնդիրներն իրականացնել: Մեկ տարում 2-րդ անգամ է կառուցվածքային փոփոխություն անում: Սա դարձրել է զուտ վրեժխնդրության գործիք»,-ասաց Ֆարմանյանը, որը ԱԺ ՀՀԿ խմբակցության պատգամավոր Սամվել Ֆարմանյանի քույրն է:
Թե որն է ռեկտորի վրեժխնդրության պատճառը, մեր այս հարցին ի պատասխան տիկին Ֆարմանյանն ասաց. «Ես բացահայտ պաշտպանել եմ բուհից հեռացված 2 տղաներին՝ Գագիկ Համբարյանին եւ Հովհաննես Խորիկյանին: Ռեկտոր Մինասյանը տարբեր օղակներում ասել է, որ հաջորդը տղաներին պաշտպանողներն են դուրս գալու գործից»:
Մեր հարցին՝ արդյոք Ֆարմանյանի համակարգող ոլորտի կարիքն այլեւս բուհում չկար, վերջինս պատասխանեց. «Ես զբաղեցրել եմ արտաքին կապերի գծով ռեկտորի տեղակալի պաշտոնը: Այսինքն, ոլորտը՝ գիտության եւ կրթության միջազգայնացումն է: Սրանք հետադիմական ուղղություններ չէին, որ վերցնեն կրճատեին: Ու, ասենք, դրա փոխարեն կարող է լինել աշխատակազմի գծով պրոռեկտոր»:
Տիկին Ֆարմանյանը վստահեցրեց՝ դատական կարգով վերականգնելու է իր աշխատանքային իրավունքները: Ֆարմանյանը նաեւ վստահեցրեց, որ ինքը կուսակցական չէ, եւ քաղաքական որեւէ գործընթացներում ներգրավված չի եղել:
Մենք փորձեցինք այս առնչությամբ պարզաբանում ստանալ նաեւ ՇՊՀ-ի ռեկտոր Սահակ Մինասյանից, որը նաեւ ՀՀԿ-ի Շիրակի կառույցի ղեկավարն է: Սակայն, նա Aravot.am-ի թղթակցի բազմաթիվ հեռախոսազանգերին չպատասխանեց:
Նելլի ԲԱԲԱՅԱՆ
Լուսանկարները՝ Անահիտ Ֆարմանյանի ֆեյսբուքյան էջից
