«Գիտությունների ազգային ակադեմիայի շենքը երբեք չի վաճառվելու»,- այսօր, լրագրողների հետ զրույցում ասել է ՀՀ պետգույքի կառավարման վարչության պետ Արման Սահակյանը:
Արման Սահակյանն ամփոփում էր իր գլխավորած կառույցի`անցած տարվա աշխատանքները: Ասաց`մուտքերը կազմել են ավելի քան 685 մլն դրամ: Նախորդ տարվա համեմատ մուտքերն աճել են 4.7 անգամ։ 2017-ին, ըստ Արման Սահակյանի, 90 ընտանիքի նվիրաբերվել ու սեփականաշնորհվել են հանրակացարաններում իրենց զբաղեցրած սենյակները։
Արման Սահակյանն անդրադարձել էր նաեւ այն պաշտոնյաներին, որոնք չարաշահումներ են կատարել կամ թերացել են իրենց աշխատանքում: Ասաց`արդեն կան պատժվածներ: Լրագրողները խնդրեցին օրինակներ բերել: Նա գերադասեց շատ մանրամասների մեջ չմտնել: Միայն ասաց, որ Ոսկերչական գործարանի կառավարչին անցյալ տարի ազատել են աշխատանքից` վնաս ձեւավորելու համար. «Նման ճակատագիր սպասվում է այն կառավարիչներին, որոնք կվատթարացնեն ՊՓԲԸ-ների աշխատանքը»։
Ի դեպ, նախկինում տարեկան հաշվետվություններ էին տրվում պետգույքի կառավարման վարչությանը, այժմ հաշվետվությունները կլինեն եռամսյա:
Նելլի ԳՐԻԳՈՐՅԱՆ
