Ինչպես տեղեկացրել ենք, ԱԱԾ-ն այսօր հայտարարություն է տարածել, ըստ որի՝ մի ամերիկահայ ՀՀ-ում հանցավոր խումբ է փորձել ստեղծել, որը պատրաստվել է զինված հարձակում իրականացնել իշխանության ներկայացուցիչների նկատմամբ:
ԱԱԾ-ն հայտնաբերել է Martin Avagyan գրանցված օգտատիրոջ էջը, որտեղ զինված հարձակման կոչեր կան:
Մենք ուսումնասիրեցինք այդ էջը եւ պարզ դարձավ, որ այն Սասնա ծռեր-2-ն է: Էջում կոչ են անում, օրինակ, վառել ՀՀԿ-ական Հակոբ Հակոբյանի տունը, մեքենաներն ու բիզնեսները:
Հրապարակումներից մեկով կոչ են անում ժողովրդին կրկին զենք վերցնել եւ հետեւել Վարուժան Ավետիսյանի կոչին: Կոչում գրված է, որ ելնելով անվտանգության կանոններից՝ հանդիպումներ չեն լինում, յուրաքանչյուր հայ, հայուհի կարող է միանալ, հաղթահարել վախը, որպես զենք օգտագործել ցանկացած ձեռքի տակ ընկած իր. «Առաջին հարվածները կարող են լինել գույքային, վնասներ պատճառել իշխանական բուրգին ծառայող անձանց»:
Հրապարակումներից մեկում էլ գրված է. «Մենք նպատակահարմար ենք գտնում պարտիզանական միջոցներով ռեժիմի հենասյուներին պատժելու եւ պատասխանատվության ենթարկելու մարտավարությունը: Միջոցները կլինեն տարբեր եւ ցավալի` ըստ ներգրավվածության աստիճանի, գործողությունները լինելու են թե ՀՀ-ում, թե ՀՀ-ից դուրս»:
Հռիփսիմե ՋԵԲԵՋՅԱՆ
