Գրող, թարգմանիչ Դիանա Համբարձումյանը Հայաստանը կներկայացնի ԱՄՆ-ի Ինդիանապոլիս քաղաքում անցկացվող Վոնեգուտյան փառատոնին, որը մեկնարկելու է նոյեմբերի 9-ին: 20-րդ դարի ամերիկյան գրականության նշանավոր գրողներից մեկի` Կուրտ Վոնեգուտի անունը կրող թանգարան-գրադարանի հայտարարած մրցույթում հայ հեղինակի կարճ պատմվածքը հաղթել է:
Դիանա Համբարձումյանին առաջարկվել է փառատոնային մեկ օր կարդալ իր հաղթած պատմվածքը, որը հրատարակվել է ամերիկյան գրական ամսագրում, մեկ օր էլ անգլերեն խոսք հնչեցնել Վոնեգուտի մասին եւ ինչ-ինչ առնչություններ «ջրի երես հանել»: «Ես միանգամից հիշեցի Վոնեգուտի` իմ թարգմանած «Կապտամորուսը» վեպը, որտեղ հայկական թեմա կա, պատրաստվում եմ նաեւ խոսել Վոնեգուտի եւ Սարոյանի մտերմությունից: Ի դեպ, Վոնեգուտը խոստովանել է, որ Սարոյանն իր հոգեւոր հայրն է եղել»,- «Առավոտի» հետ զրույցում հայտնեց հայ արձակագիրը:
ԳՈՀԱՐ ՀԱԿՈԲՅԱՆ
«Առավոտ»
31.10.2017
