Վարչական դատարանում այսօր ՀՀ ոստիկանության կողմից «Հիմնադիր խորհրդարանի» անդամ, քաղաքացիական ակտիվիստ Հասմիկ Էվոյանի դեմ ուղղված հայցի քննությունը հետաձգվեց. Էվոյանի շահերի ներկայացուցիչը հակընդդեմ հայց էր ներկայացրել, որին ծանոթանալու համար ոստիկանության ներկայացուցչին ժամանակ տրվեց:
Նախորդ տարվա մարտի 24-ին մի շարք քաղաքացիական ակտիվիստներ Մաշտոցի պուրակին հարակից տարածքում կազմակերպել էին հավաք՝ «ի պաշտպանություն Գեւորգ Սաֆարյանի եւ մյուս քաղբանտարկյալների»: Նրանց մի մասն իրեն «շղթայել էր» եւ պառկել Մաշտոցի պողոտայում, ինչից հետո ոստիկանությունը որոշ ակտիվիստների բերման էր ենթարկել:
Հասմիկ Էվոյանը «շղթայվածների» թվում չի եղել, այնուամենայնիվ, Ոստիկանությունը վարչական իրավախախտումների վերաբերյալ հայցադիմում է ներկայացրել դատարան, որը մասնավորապես վերաբերում է Հասմիկ Էվոյանի կողմից հավաքի մասնակցի պարտականությունները եւ ոստիկանի՝ հավաքի բնականոն ընթացքն ապահովելուն ուղղված օրինական պահանջը չկատարելուն:
Aravot.am-ի հետ զրույցում Հասմիկ Էվոյանի շահերի ներկայացուցիչ՝ ՀՔԱ Վանաձորի գրասենյակի իրավապաշտպան Տաթեւիկ Սիրադեղյանը հայտնեց, որ իր ներկայացրած հակընդդեմ հայցն էլ վերաբերում է տվյալ օրը ոստիկանության գործողությունները(որոնք հանգեցրել են Հասմիկ Էվոյանի որոշ սահմանադրական իրավունքների խախտմանը) ոչ իրավաչափ ճանաչելուն:
Կարդացեք նաև
«Ոստիկանությունն իր հայցով պահանջում է Հասմիկ Էվոյանին ենթարկել վարչական պատասխանատվության, որը ենթադրում է տուգանք՝ որպես պատասխանատվության միջոց: Հասմիկ Էվոյանն այդ օրը եւս բերման էր ենթարկվել: Մեր դիրքորոշումն է՝ Հասմիկ Էվոյանը, որպես հավաքի մասնակից, հակասահմանադրական վարքագիծ չի դրսեւորել»,-ասաց Տաթեւիկ Սիրադեղյանը:
Հավելենք, որ այս գործով հաջորդ նիստը նշանակվել է մարտի 27-ին, ժամը 12:40-ին՝ Վարչական դատարանում:
Լուիզա ՍՈՒՔԻԱՍՅԱՆ
