Վարչական դատարանում դատավոր Միքայել Մելքումյանի նախագահությամբ քննվում էր ոստիկանության հայցն ընդդեմ Հիմնադիր խորհրդարանի անդամ Արմեն Միքայելյանի:
Ոստիկանությունը դատարան պահանջ էր ներկայացրել Միքայելյանին պատասխանատվության ենթարկել Վարչական իրավախախտումների վերաբերյալ օրենսգրքի 180.1-րդ հոդվածի 11-րդ եւ 15-րդ կետերի պահանջներով, այն է` հավաքի մասնակցի կողմից օրենքով սահմանված իր պարտականությունները չկատարելը եւ հավաքի խաղաղ եւ բնականոն ընթացքի ապահովման վերաբերյալ ոստիկանության` օրենքով սահմանված պահանջները չկատարելը:
Դատական նիստի ընթացքում Արմեն Միքայելյանի ներկայացուցիչ Տաթեւիկ Սիրադեղյանը դատարանին ներկայացրեց հակընդդեմ հայցը՝ ոստիկանության գործողությունները ոչ իրավաչափ ճանաչելու պահանջով եւ նաեւ կողմի առարկությունները: Դատական նիստը հետաձգվեց:
Արմեն Միքայելյանը Aravot.am-ի հետ զրույցում ասաց, որ համաձայն չէ ոստիկանության ներկայացրած հայցի հետ, քանի որ ինչպես մյուս դեպքերում, նաեւ այս դեպքում ոստիկանությունը անօրինական քայլեր է ձեռնարկել, ինչից հետո պայքարողները վարչական տուգանքի են արժանանում, որը ըստ նրա, պատժի միջոց է հանդիսանում նրանց համար. «Բողոքի ակցիա էր տեղի ունենում Մաշտոցի պողոտայում ի պաշտպանություն Գեւորգ Սաֆարյանի եւ մյուս քաղբանտարկյալների: Մի խումբ անձինք շղթայված պառկեցին պողոտայում, փակեցին փողոցը եւ շղթաները գամեցին ասֆալտին: Դրանից հետո ոստիկանությունը եկավ բռնի ուժ կիրառելով բերման ենթարկեց մոտ 16-17 մասնակցի՝ առանց որեւէ հիմք ներկայացնելու
Կարդացեք նաև
Ոստիկանությունը իրավունք չունի հավաքը ցրել, քանի դեռ հավաքը խաղաղ է ընթանում: Այնտեղ ոչ մի բռնության կոչ, բռնության կիրառում տեղի չի ունեցել: Այսինքն՝ խաղաղ հավաքի բնականոն ընթացքը չի խախտվել: Ոստիկանությունը պարտավոր էր ապահովել խաղաղ հավաքի մասնակիցների անվտանգությունը, ոչ թե խոչընդոտել հավաքին»:
Ամի ՉԻՉԱԿՅԱՆ
