Երևան քաղաքի Նոր Նորքի 9-րդ զանգվածի թիվ 119 նախնական ուսումնական հաստատությունում տեղակայված 2/32 ընտրատեղամասի հանձնաժողովի անդամ Նարինե Հովհաննիսյանին մեղադրանք է առաջադրվել` 2015 թվականի դեկտեմբերի 6-ին կայացած ՀՀ սահմանադրության փոփոխությունների հանրաքվեի ժամանակ երեք հոգու փոխարեն քվեարկելու համար:
«Հիշյալ տեղամասի ընտրողների թիվ 2-րդ մատյանում, Երևան քաղաքի Նոր Նորքի 9-րդ զանգ. 15 շենքի թիվ 114 բնակարանում հաշվառված Մարինե Կարապետի Փափազյանի, Հռիփսիմե Կարապետի Դեմիրճյանի և Թամարա Վանիկի Բարսեղյանի տվյալների դիմաց գիտակցաբար գրառել է մտացածին անձնագրային կեղծ տվյալներ, որոնց դիմաց ստորագրել և կնիքել է իրեն հատկացված «Ա-55056» կնիքի դրոշմով, ապա 3 քվեաթերթիկ գցել է քվեատուփը՝ այդ կերպ քվեարկելով այլ անձանց ՝Մ.Փափազյանի, Հ.Դեմիրճյանի և Թ.Բարսեղյանի փոխարեն»,- ասված է մեղադրանքում:
Ըստ Քաղաքացիական դատավարության օրենսգրքի համապատասխան հոդվածի, նախատեսվում է վեց ամսից երեք տարի ազատազրկում կամ տուգանք` նվազագույն աշխատավարձի 200-600-ապատիկի չափով:
Կարդացեք նաև
Ավան եւ Նոր Նորք վարչական շրջանների ընդհանուր իրավասության դատարանի դատավոր Դավիթ Հարությունյանի նախագահությամբ նիստն արագացված կարգով ընթացավ, քանի որ Նարինե Հովհաննիսյանն ընդունեց առաջադրված մեղադրանքը:
Նկատի ունենալով հարեւանների կողմից ներկայացրած դրական բնութագիրն առ այն, որ մինչ օրս չի եղել մի դեպք, որ Նարինեն «հարեւանների մատից փուշ հանած չլինի», որ նա նախկինում դատապարտված չի եղել, նաեւ այն, որ Նարինե Հովհաննիսյանն ապրում է բազմանդամ`10 հոգանոց ընտանիքում եւ այլն, դատախազն առաջարկեց սահմանափակվել 600 հազար դրամ տուգանքով:
Պաշտպանն ու մեղադրյալը հորդորեցին ավելի մեղմ պատիժ սահմանել, քանի որ մեղադրյալը չի աշխատում:
Դատարանը որոշեց Նարինե Հովհաննիսյանին տուգանել 500 հազար դրամի չափով:
Նելլի ԳՐԻԳՈՐՅԱՆ
