Այսօր Վարչական դատարանում ՀՔԱ Վանաձորի գրասենյակն ընդդեմ ԱԱԾ-ի գործով նախնական նիստն էր:
Այս տարեսկզբին ՀՔԱ Վանաձորի գրասենյակը տեղեկատվություն ստանալու հարցում էր ներկայացրել ազգային անվտանգության ծառայության տնօրեն Գորիկ Հակոբյանին՝ կառավարության 2014թ. փետրվարի 27-ի թիվ 303Ն որոշմամբ հաստատված «Մարդու իրավունքների պաշտպանության ռազմավարությունից բխող միջոցառումների ծրագրի շրջանակներում» իրականացված գործողությունների մասին տեղեկատվություն ստանալու նպատակով:
ԱԱԾ-ն մերժել էր կազմակերպության հարցումը՝ հիմնավորելով, թե հարցմանը վերաբերող տեղեկատվությունը պարունակում է ծառայողական գաղտնիք համաձայն «Տեղեկատվության ազատության մասին» ՀՀ օրենքի 8-րդ հոդվածի 1-ին մասի 1-ին կետի եւ չի կարող տրամադրվել:
ՀՔԱ Վանաձորի գրասենյակը գտնում է՝ հարցված տեղեկատվությունը իր բնույթով և գործողություններով չի կարող դիտվել որպես ծառայողական գաղտնիք եւ տեղեկատվությունը ստանալու պահանջով դիմել դատարան: Գրասենյակը դատարանից պահանջում է՝ պարտավորեցնել ԱԱԾ-ին տրամադրել 26.01.2015թ-ին հայցված տեղեկատվությունը:
Կարդացեք նաև
Այսօր նախնական նիստում պատասխանող կողմը պնդեց իր դիրքորոշումը, թե պահանջվող տեղեկատվությունը ծառայողական գաղտնիք է, եւ չեն կարող տրամադրել: Դատական կարճատեւ նիստի ընթացքում որոշվեց ապացույցների հետազոտման կարգը, նիստը հետաձգվեց:
Արփինե ՍԻՄՈՆՅԱՆ
