Այս շաբաթ Հատուկ քննչական ծառայությունում նախատեսված է Երեւանի փոխոստիկանապետ Վալերի Օսիպյանի եւ քաղաքացի Սմբուլ Հովհաննիսյանի միջեւ առերեսումը, որը պետք է տեղի ունենար նախորդ շաբաթ:
Տիկին Հովհաննիսյանին դեռ հայտնի չէ, թե այս շաբաթ որ օրն է առերեսման գնալու, նրան հայտնի չէ նաեւ անցած շաբաթ նախատեսված առերեսման հետաձգման պատճառները:
Հիշեցնենք, որ Սմբուլ Հովհաննիսյանը Վալերի Օսիպյանի եղբորորդու ընկերոջ մայրն է: Վերջինիս պնդմամբ, Վալերի Օսիպյանը իրեն գործարք է առաջարկել` խնդրելով, որ իր եղբորորդու կատարած դանակահարությունը իր վրա վերցնի իր տղան: :
Հիշեցնենք նաեւ, որ Սմբուլ Հովհաննիսյանի բողոքի հիման վրա ՀՔԾ-ում քրեական գործ է հարուցվել Վալերի Օսիպյանի նկատմամբ:
Տիկին Հովհաննիսյանը Aravot.am-ին պատմեց նաեւ , որ Վալերի Օսիպյանն արդեն կազմակերպել է տուժողի` իր եղբորորդու կողմից դանակահարված Վանուշ Ալեքսանյանի ապաքինման գործընթացը, իր վրա է վերցրել բուժման ծախսերը:
Կարդացեք նաև
Հիշեցնենք, որ Վանուշ ԱԼեքսանյանի մայրը հերքում էր Օսիպյանների կողմից նյութական օգնությունը` պնդելով, որ որդու ապաքինման ծախսերը հոգում են իրենք:
«Ես հետեւել եմ ու բռնել, Օսիպյանները իմ վերեւի հարկի հարեւանուհուն, որը բուժքույր է վճարում էին, որ գնա ու հետեւի տուժողի առողջական վիճակին: Մի քանի օր հետո հարեւանուհիս էլ հրաժարվեց Օսիպյանների առաջարկած ծառայությունից, ամուսինը չթույլատրեց, հրաժարվեց, որ անունը չկապվի էդ գործի հետ: Բուժման ծախսերն իրենց վրա են վերցրել, որ տուժողի հարազատները չբողոքեն »,- պատմեց Սմբուլ Հովհաննիսյանը:
Արփինե ՍԻՄՈՆՅԱՆ
