ՀԱԿ տնտեսական և բնապահպանության հարցերի հանձնաժողովի նախագահ Վահագն Խաչատրյանի համոզմամբ, Ռուսաստանի ցանկությունն է Հայաստանի` Մաքսային միությանը չանդամակցելու հայտարարությունը:
Հիշեցնենք, որ պաշտոնապես արդեն հայտարարվել է, որ Հայաստանը չի անդամակցի ՄՄ-ին, այլ միանգամից մաս կկազմի Եվրասիական տնտեսական միությանը: Որովհետեւ նախատեսված է, որ 2015թ-ից Մաքսային միությունը կդադարի գործել և կդառնա Եվրասիական ազատ տնտեսական գոտի:
«Ռուսաստանի ներկայացուցիչների ցանկությունն է եղել, որ միանգամից անցնեն Եվրասիական միություն, այսինքն, դա ինտեգրման հաջորդ աստիճանն է»,- ասաց պարոն Խաչատրյանը:
Ըստ նրա, Հայաստանի հարկային քաղաքականությունը առավելություններ ունի, ավելի մեղմ դաշտում ենք եւ ՄՄ մտնելիս կարելի էր օգտագործել այդ հանգամանքն ու մրցակցային ապրանք ունենալ շուկայում. «Բայց հիմա մենք այդ հնարավորությունից մեզ զրկում ենք, որովհետեւ Եվրասիական միության գաղափարախոսները լավ հասկանում են` ինչ է նշանակում միության մեջ մի երկիր ունենալ, որը քո նկատմամբ ունի առավելություններ: Հայաստանը կդառնար տրանզիտ մի երկիր, որտեղ Չինաստանից կամ գնային առումով մատչելի արտադրանք թողարկող այլ երկրների համար կդառնայինք հավաքման կետ, հիմա մեզ զրկում ենք այդ հնարավորությունից: Դա կբերիր գների աճ: Ունենալով մոտ երեք անգամ ցածր կենսամակարդակ եւ ավելի դանդաղ աճող տնտեսություն՝ մեզ ավելի վատ վիճակի մեջ կդնի, քան Ռուսաստանին, որը բարձր կենսամակարդակ ունենալու արդյունքում, բարձր կենսաթոշակ ու աշխատավարձ է տալիս»:
Կարդացեք նաև
Պարոն Խաչատրյանը բացատրեց նաեւ Եվրասիական տնտեսական գոտու ու ՄՄ-ի տարբերությունը: Ըստ նրա, ՄՄ-ն Ռուսաստանի օգտին չէր. «Հիմա պատերազմը գնում է Բելառուս-Ռուսաստան, Ղազախստան-Ռուսաստան, որովհետեւ օրինակ Ղազախստանի ակցիային հարկատեսակները խմիչքի, ծխախոտի վրա ավելի ցածր են, քան` Ռուսաստանինը: Իսկ դա բերում է նրան, որ ղազախական ապրանքները գնում են Ռուսաստան: Ռուս արտադրողներն էլ ասում են` ինչ եք անում, մենք փակել էինք մեր սահմանը բարձր մաքսատուրքերով , որ ներքին արտադրություն խթանենք, մեզ զրկում եք այդ հնարավորությունից, այդ հնարավորությունը տալիս եք Ղազախստանին ու Բելառուսին: Ինչ տարբերություն մեզ համար եվրոպական երկրներ, թե սրանք: Ռուսաստանը դրա համար անցնում է երկրորդ աստիճանին` Եվրասիական միություն, որտեղ այդ անդամ երկրներին ազատ տնտեսական քաղաքականությունից զրկելու են, բայց հիմնական խաղացողը` Ռուսաստանը, խաղի կանոնները թելադրողն է լինելու, իսկ թելադրելու է իր շահից ելնելով»:
Արփինե ՍԻՄՈՆՅԱՆ
