Այսօր մի քանի քաղաքացիական ակտիվիստներ, քաղաքական գործիչներ եւ ուղղակի մտահոգ հայաստանցիներ «Հաղթանակ» զբոսայգու մոտից շարժվեցին դեպի ՀՀ-ում Ուկրաինայի դեսպանատուն՝ իրենց զորակցությունը հայտնելու ուկրաինացի ժողովրդին, եւ դատապարտելու Կիեւում կատարված արյունահեղությունը: Ցույցը կրում էր «Մենք եւս Մայդանում ենք» խորագիրը:
Ցույցի մասնակիցները կոչ արեցին միջազգային ժողովրդավարական եւ քաղաքացիական ուժերին, կառավարություններին՝ հնարավոր բոլոր միջոցներով սատարել և աջակցել Ուկրաինայի քաղաքացիներին՝ պահանջելով Ուկրաինայի իշխանություններից դադարեցնել բռնությունները սեփական քաղաքացիների նկատմամբ:
Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը պատահական չի համարում միջոցառման սկզբնակետը՝ «Հաղթանակ» զբոսայգին: «Մեր նպատակը երեկ Մայդանում Յանուկովիչի կողմից Ուկրաինայի քաղաքացիների նկատմամբ բռնի գործողությունների դատապարտումն է, որը, ցավոք սրտի, ավարտվեց այս պահին առնվազն 21 մահացու դեպքով, կան նաեւ 40-ի չափ ձերբակալվածներ, շուրջ 1000 վիրավորներ: Սա, իհարկե, անմիջականորեն ասոցացվում է մեզ մոտ 2008 թ. մարտի 1-ի իրադարձությունների հետ: Մի բան հստակ է՝ 2008 թ. մարտի 1-ի հանցագործությունը չդատապարտելը կամ դրա պատասխանատուներին պատասխանատվության չենթարկելը իրապես ծնում է եւ շղթայական ռեակցիայի էֆեկտով տարածվում է նաեւ մյուս երկրներում, որին ականատես եղանք հանձինս Ուկրաինայի:
Մենք բարձրաձայնում ենք, որ բռնապետությունը ազգային պատկանելություն չունի, իրավունքների համար պայքարը նույնպես չունի ազգային պատկանելություն … Միաժամանակ դատապարտում ենք ակնհայտ ապօրինի եւ մարդատյաց գործողությունները, պահանջելով ՝անհապաղ պատասխանատվության ենթարկել անձամբ Յանուկովիչին: Այդ մարդը բառացիորեն մի ամբողջ օր հարկ չհամարեց հանդես գալ հրապարակավ եւ հայտնել իր պահանջները ու զբաղվեց ակնհայտ խաբեությամբ: Ինձ մոտ այնպիսի տպավորություն է, որ Յանուկովիչը եւ ՀՀ իշխանությունները՝ հանձին Սերժ Սարգսյանի, որպես ուղեցույց վերցնում են ՀԱՊԿ-ի Բորդյուժայի ցուցումները գունավոր հեղափոխությունները կասեցնելու ուղղությամբ, փոխանակ կատարելու ԵԽ անդամ պետությունների պարտավորությունները, որոնց հիմքում ընկած է Մարդու իրավունքների հիմնարար ազատությունների եվրոպական կոնվենցիան»:
Կարդացեք նաև
Արթուր Սաքունցը հայտարարում է. «Մենք չէինք կարող անտարբեր լինել, սա նաեւ մեսիջ է հայաստանյան իշխանություններին, որ ՀՀ քաղաքացիները չեն մոռացել մարտի 1-ը: Իսկ բռնապետները թող հույս չունենան, թե կարող են իրենց իրավունքների համար պայքարող քաղաքացիներին տարանջատել ըստ ազգային պատկանելության, որ տիրեն: Սա նաեւ «մեսիջ» է Ռուսաստանի բռնապետ Պուտինին, որը անգամ հաշվի չառավ օլիմպիադան»: Մանրամասները՝ տեսանյութում:
Գոհար ՀԱԿՈԲՅԱՆ
