Դեսպանատան աշխատակիցը` լրագրողին. «Դուք ինչո՞ւ եք տառապում ադրբեջանցիների փոխարեն»

Այսօր Ռուսաստանի դեսպանատանը միգրացիոն օրենսդրության փոփոխության վերաբերյալ հրավիրված ասուլիսին դեսպանատան ներկայացուցիչ Սվետլանա Ստեպանովան խիստ վրդովվում էր, երբ լրագրողները միգրացիայի վերաբերյալ հարցը Մաքսային միության ենթատեքստով էին տալիս: Նմանատիպ հարցերը տիկին Ստեպանովան անընդհատ «ցրում էր», պատճառաբանելով, որ իրավասու չէ նման հարցերի պատասխանել, նման հարցերը դեսպանը կարող է պատասխանել. «Քաղաքական հարցեր մի տվեք: Այնպիսի տպավորություն է, որ ձեզ չեն հետաքրքրում միգրացիոն հարցերը»:

Իսկ լրագրողներն ընդամենը հետաքրքրվում էին, թե օրինակ՝ ինչ ընթացքում է վերջերս Հայաստանի ազգային անվտանգության խորհրդի ղեկավար Արթուր Բաղդասարյանի` իր ռուս կոլեգային ուղղված նամակի պատասխանը. Այդ նամակով հայկական կողմը Ռուսաստանից միգրացիոն գործընթացներում հայերի համար արտոնություններ է խնդրում. արդյոք Հայաստանի` Մաքսային միությանը անդամակցելուց հետո ՀՀ քաղաքացիների համար միգրացիոն կանոններն այլ կլինե՞ն, այս հարցը եւս զայրացրեց ռուս տիկնոջը:

Լրագրողներից մեկի այն հարցին, թե, ըստ որոշ տեղեկությունների, Ռուսաստանում Ադրբեջանից 80 հազար փախստականներ կան, ռուս աշխատակիցները ադրբեջանցի փախստականներին որպես հայրենակի՞ց են վերաբերվում, թե՞ օտարերկրացի:

Տիկին Ստեպանովան հարցը լսելուց խորը հոգոց հանեց, շատ կամաց, քթի տակ ասաց` «ой, не могу», ապա բարձրաձայն պատասխանեց` «Ինչպիսին հարցն է, այնպիսին էլ` պատասխանը, ես դեսպանատան աշխատակից եմ, այլ ոչ թե միգրացիոն ծառայության: Ադրբեջանցի փախստականների համար թող տառապի Ադրբեջանը, դուք ինչո՞ւ եք տառապում նրանց փոխարեն»:

Այս պատասխանն էլ բորբոքեց լրագրողին, տիկին Ստեպանովան եւ դեսպանատան մամուլի քարտուղարը նորից հորդորեցին միայն միգրացիայի վերաբերյալ հարցեր տալ եւ հարգալից վերաբերմունք պահանջեցին, ինչին ի պատասխան լրագրողն ասաց` «Մենք էլ պահանջում ենք հարգանք մեր նկատմամբ»:

Նելլի ԲԱԲԱՅԱՆ