Կապանում քչերը գիտեին, որ այսօր «Հայկական մամուլի օրն է»: Թերթի կրպակներում սովորականի պես այսօր էլ թերթ գնողներ կային, բայց նրանք էլ տեղյակ չէին, որ հոկտեմբերի 16-ը մամուլի օրն է:
Թեեւ կրպակի աշխատակիցներն ասում են, որ վերջին տարիներին առցանց լրատվամիջոցների ակտիվ գործունեության առկայության պարագայում ընթերցողների թիվը համեմատաբար նվազել է, բայց մշտական ընթերցողները շարունակում են հավատարիմ մնալ տպագիր մամուլին: «Նախընտրում եմ թերթ կարդալ, թերթում կարողանում եմ գտնել էն, ինչ-որ չկա հեռուստաեթերում: Սովորաբար տարբեր թերթեր եմ կարդում, որ տեսնեմ ընդդիմադիր թերթն ինչ է գրում, իշխանական թերթն ինչ է գրում: Էսօր տպագիր մամուլն անհրաժեշտություն է, մամուլը լավ բան է, ինչ-որ չափով ազդեցություն է թողնում, բայց թող ճիշտ բաներ գրեն ու ժողովրդի շահերը պաշտպանեն, քիչ են գրում ժողովրդի մասին, ավելի շատ կենտրոնացած են կուսակցությունների կամ քաղաքական այլ թեմաների վրա», – ասաց մշտական ընթերցող Ռազմիկ Քարամյանը:
Թերթի կրպակի աշխատակցուհի տիկին Սվետլանան ասում է, որ այսօր երիտասարդները թերթ չեն գնում, հիմնական ընթերցողները միջին տարիքի բնակիչներ են, որոնց թիվն այդքան էլ քիչ չէ Կապանում: Օրվա ընթացքում ստացած թերթերի օրինակների կեսը կամ կեսից ավելին հիմնականում վաճառվում են, հատկապես թերթերը շուտ են սպառվում, երբ երկրում կարեւոր իրադարձություններ են տեղի ունենում:
«Մարդ կա, որ իրա համար թերթը հաց ու ջրի նման մի բան է:
Մոտ 3 տարի է կրպակում եմ աշխատում, նկատել եմ, թերթերի ակտիվ վաճառքը կապված է կարեւոր իրադարձությունների հետ: Եթե երկրում կարեւոր իրադարձություններ են տեղի ունենում, գալիս են էդ օրվա թերթերն ակտիվ առնում, նույնիսկ մեկը մյուսին է տեղյակ պահում, որ գան առնեն: Թերթերը միշտ կվաճառվեն, եթե բնակիչներին հետաքրքրող թեմաներ լինեն», – հավելեց կրպակի աշխատակցուհին:
28-ամյա Դավիթ Գեւորգյանը թերթ չի գնում, քանի որ իրեն հետաքրքրող հոդվածները ընթերցում է առցանց մամուլից, որն ավելի օպերատիվ է աշխատում եւ արագ ինֆորմացվելու հնարավորություն է տալիս իրեն:
Տպագիր մամուլում մոտ 30 տարվա լրագրողի աշխատանքային փորձ ունեցող Վահրամ Օրբելյանը, ցավով է նշում, որ այսօրվա սերունդը թերթ չի կարդում: Նրա կարծիքով՝ տպագիր մամուլը դեռ իր կշիռն ունի՝ անկախ նոր սոցիալական մեդիայի ակտիվ գործունեության: Համեմատելով մոտ երեսուն տարի առաջ գոյություն ունեցող տպագիր մամուլն ու ներկայիսը՝ ընդգծում է, որ թեեւ այսօր ավելի ազատ է դարձել մեդիա դաշտը, բայց նախկինի պես իշխանությունները չեն զգաստանում ու հաշվի չեն նստում մամուլի հրապարակումների հետ: Կապանի թերթի կրպակներում Վահրամ Օրբելյանին բոլորն են ճանաչում, մշտական ընթերցողներից է:
«Ես մի քիչ հին մարդ եմ, ինձ տպագիր մամուլը մագնիսի պես ձգում է: Ես ամեն անգամ թերթ առնելիս, երբ բացում եմ այն, միշտ ներկի հոտն եմ առնում, դրանով եմ դաստիարակվել…: Տպագիր մամուլն այսօր դեռ իր դերն ունի, կարող է 20 տարի հետո իրավիճակը փոխվի եւ կշեռքի նժարը թեքվի դեպի սոցցանցեր, բայց մինչ այդ կրպակից թերթ գնողներ կլինեն: Առցանց լրատվամիջոցներում այսօր տեղ են գտնում շատ խայտառակ լեզվով, փնթի, իրար վիրավորող հրապարակումներ, բայց տպագիր մամուլում էթիկայի կանոնները պահպանվում են», -ասաց «Սյունյաց երկիր» մարզային թերթի լրագրող, խմբագրի տեղակալ Վահրամ Օրբելյանը:
Ի դեպ, այսօր Կապանի քաղաքապետ Աշոտ Հայրապետյանը տոնի առթիվ կապանցի լրագրողներին ճաշկերույթի էր հրավիրել եւ շնորհավորել նրանց տոնը:
Մերի ՍՈՂՈՄՈՆՅԱՆ
