Հելսինկյան քաղաքացիական ասամբլեայի Վանաձորի գրասենյակի հրապարակած «Հոգեկան եւ նարկոլոգիական բժշկական օգնության եւ խնամքի ծառայությունների ֆինանսավորման գնահատում» զեկույցում, որտեղ անդրադարձ կա նյադահոգեբուժական բուժհաստատությունների կողմից մատուցված ծառայությունների ֆինանսավորմանը, նշվում է, որ այդ մասին մատուցված տեղեկատվությունը սահմանափակ է: Եվ չնայած իրավական տեսանկյունից օրենսդրությունը հստակ ձեւակերպում է ֆինանսական փոխհարաբերությունները ծառայություններ մատուցողի եւ ֆինանսավորողի միջեւ՝ ֆինանսական հոսքերի վերլուծության տեսակետից կան բարդություններ: Ըստ զեկույցի՝ պետական բյուջեում արտացոլվող տեղեկատվությունից անհնար է տեղեկանալ դատաբժշկական փորձաքննական ծառայություններին հատկացված ֆինանսական միջոցների մասին: Առողջապահության նախարարության մակարդակով նարկոլոգիական եւ հոգեբուժական ծառայությունների մասով որեւէ տեղեկատվություն չի հրապարակվում: Բացակայում է նաեւ տեղեկատվությունը՝ պետական առողջապահական գործակալության ինտերնետային կայքում: Նշվում է նաեւ, որ ծառայություններ մատուցողների մակարդակում տեղեկատվության հասանելիության մակարդակը առավել ցածր է: Տեղեկատվության թափանցիկությունը՝ հասանելիության, հավաստիության, ժամկետայնության առումով՝ անբավարար է:
Ուսումնասիրելով հոգեբուժական եւ նարկոլոգիական առողջապահական ծառայությունների պետական ֆինանսավորումը եւ առկա ֆինանսների պայմաններում մատուցվող առողջապահական ծառայությունները՝ եզրակացվել է, որ հոգեբուժական եւ նարկոլոգիական ծառայությունների մատուցման մակարդակը քանակական եւ որակական առումներով անբավարար է:
Նշվում է նաեւ, որ ծախսերի արդյունավետության բարձրացմանը չի նպաստում նաեւ ոլորտի նկատմամբ պետության վերաբերմունքն ու քաղաքականությունը: Պետական պատկան մարմինները անհրաժեշտ ուսումնասիրություններ եւ վերահսկողություն չեն իրականացնում ծառայությունների մատուցման որակի վերաբերյալ եւ այլն: Պետության կողմից ոչ պատշաճ վերաբերմունքը հստակ է նաեւ բյուջեից հատկացվող մեծություններից, որը կախված է պետական բյուջեի մեծությունից, ոչ թե փաստացի անհրաժեշտությունից, ինչն օրենքի պահանջ է: Ոլորտի առջեւ ծառացած խնդիրները փորձ է արվում լուծել հնացած մեթոդներով:
Զեկույցում առաջարկվում է մշակել ոլորտի զարգացման փաստաթղթեր, մշակել ծառայությունների տրամադրման այլընտրանքային ճանապարհներ, հիմնվելով արտասահմանյան պետություններ փորձի վրա:
Կարդացեք նաև
Պատրաստեց՝ Եվա ՀԱԿՈԲՅԱՆԸ
