ՀՔԴՄ նախագահ, ԱԺ պատգամավոր Խոսրով Հարությունյանը լրագրողների հետ հանդիպման ժամանակ անդրադառնալով Նաիրա Զոհրաբյանի հայտարարությանը, կապված խորհրդարանական հանրապետության ստեղծմանն ու դրա վերաբերյալ Էդուարդ Շարմազանովի պատասխանին, ասաց. «Չեմ ուզում որեւէ մեկին մեկնաբանել, կասեմ իմ վերաբերմունքը. այստեղ խոսքը խորհրդարանական հանրապետություն, սահմանադրական համակարգ ստեղծելու մասին է: Համակարգ, որում խորհրդարանը ունի բացառիկ պատասխանատու քաղաքական դերակատարում: Ես երբեւէ չեմ մերժում, որ մեր հանրապետությունը կարող է ընտրել այդ մոդելը, բայց այդ մոդելին անցնելու համար պետք է մեկ նախապայման՝ դա քաղաքական կուսակցությունների կայացած լինելն է: Բայց քանի դեռ մեր կուսակցությունները հասարակության համար տեսանելի, թափանցիկ, մատչելի չեն՝ դա վաղաժամ է»:
Հարությունյանը գտնում է, որ կիսանախագահական համակարգը մեր երկրում իրեն արդարացրել է, եւ այն, որ այժմ երկրում կան արատներ, կապված կաշառակերության, իշխանության չարաշահման եւ այլնի հետ, դրանք պայմանավորված չեն տնտեսական, քաղաքական, այս կամ այն, համակարգի հետ: «Իշխանությունները փոխվել են, երեկվա իշխանությունը այսօր դարձել է ընդդիմություն եւ հակառակը, բայց արատները նույնն են մնացել: Ինձ համար տարօրինակն այն է, որ ասում են, թե մենք սկսում ենք քաղաքական կոնսուլտացիաներ, սա անչափ հապճեպ է, ունի այլ նպատակներ: Չկայացած քաղաքական կուսակցություններով պետական կառավարման համակարգի ծանրություն վերցնելը վտանգ է հանդիսանում ազգային անվտանգության առումով»:
Եվա ՀԱԿՈԲՅԱՆ
